CROSS CHUNGA JESU THUSEI 7 HO
Mihem khat chun athiding kon alaicha pet a athusei doh chu alungthim pumpia agilpen leh imchep umlou hel a aseidoh ahitan ahi. Achesa 2019 kum chun katohna hospital achun Cancer damlou khat aji achate jousen polanga anga pet in phulou helou in ama umna ICU room sunga chun ahung thitan ahi.
Apao athi thu chu aji achaten ahet phat uvin, nasa tah in nurse ho chungah alung hang uvin, ICU room sungah akitom uvin kotkhah glass ho geiyin ajep seuvin ahi. Hospital security leh thunei hon ipi dinga chutia kitom nahiuvam, oleh keiho tha nahisah uham tia adoh leu, achate chun athiding kon alaicha pet neisei peh pouve tin adonbut uvin ahi. Kapao hin athi masanga inmun loumun eihop toh peh manlou jeh uva lunghang kahiuvin, tun ama la houthei ahitapon hijeh achu lunghan kahiuve atiuvin ahi. Hiche chun avetsah chu thikon laicha pet a thucheng kiseidoh hi agil a gil, adam nalai ho dinga mang talou helding thucheng ahi.
Jesun jong adamlaiyin thuhil leh thil kidang tamtah abolnai, hijong leh alaicha pet a thucheng sagi jen eidalhah peh uhi, anungjui ho dinga suhmil leh geldao thei hilou hel ahi. Hiche Jesu thucheng sei sagi ho chu ihinkho uva manthei (apply) nadingin chomchan iseidoh nom uvin ahi.
1. MIDANG NGAIDAM DING (Forgive others):
"Pa, amaho hi ngaidam in, ajeh chu ipi abol'u ahepouve" (Lk 23:34).Mihem khat dinga imelma ngaidam ding kiti chu thil hahsa loitah ahi. Isopi that leh ichenna in leh lou eihal lhah peh ho gah moh ngaidam ding kiti jong chu bailou beh ahi. Themmona neilou Jesun ama khenbeh ho dinga ngaidam athum peh nahlai hi ngaito leo hen, Pathen lhagao panna lou chun eihon jong melma ngaidam theina ineithei louhel diu ahi. Tuchung Pandemic jeh a lockdown sunga migilou gucha michom tamtah songkul a kon bail a lhadoh nadia Govt. in ngaidamna anei thei leh nangle keiyin jong iheng ikom, iloi ipai ho jong ngaidam a kichampi hi igot diu chu Jesu khonungjui hina jong ahi.
2. VANGAM HI AUM MONG AHI (Heaven is real):
"Tahbeh a kaseipeh nahi, tunia keitoh choldona gam noma ium khom ding ahi." (Lk 23:43).
Leiset a hinkho mangnom behseh hon vangam lhangaina anei theilou utoh kilhonin, vangam umding jong atahsan joulou u ahi. Hiche thucheng Jesun aseidoh hin vanngam hi aum monge ti phot chetna ahi. Vangam chu tahsan chate dinga aum monge ti iphot chet leo, ama taitom ho um nading meidel jong chu aum monge tina ahitai. Hoiche joh chu nalhen ding ham?
3. NU LEH PA LUNGSET DING (Care for your parents):
"Numei, nachapa chu kivet in, nanu jong chu kivet in"(Jn19:26-27). Hiche thucheng hin nu leh cha, cha leh nu kikah a kingailut ding avetsah in ahi. Chapang khohethei lou a ium laiya pat eihin khoukhah toupeh inu ipa chu mipilhing ihi geiya musit lou a lungset jingding avetsah in ahi. Pathen gou manlutah chate jong phatah a khoukhah ding angaidan jong minu mipate a dinga jildoh thei ahi.
4. PATHEN LHANGAI NA (Longing for God):
"Ka-Pathen, Ka-Pathen, ibol'a neilha hitam"
(Matt. 27:46; Mrk 15:34):
Tulai vannoi leiset pumpia aching athem, alen alal, ahao avai aboncha Covid-19 pandemic jeh a lungdong tah a iumpet uva Pathen kom bel tilou adang aum tapon ahi. Hiche pandemic hi Pathen gaosapna ahi ti lampang sanga Pathen in ama kom belna dinga lei mihem te eikou nao ahi tia lah dingin aphan ahi. Ps.46:10 achun "Umthim uvinlang hiche hi heuvin, namtin vaipi lah a chungnungpen, vannoiya thanei chungnungpen kahi" tin Pathen in aseiyin ahi. Ijat in Nuclear weapon nei jong leh super power America jong tuchung virus maiyah aboh khup del jengin ahi. Hiche Coronavirus sanga hatjo Pathen koma koima pangjou louhel ding ahi.
5. HINTWI THENG NGAICHATNA (Be thirsty for the living water):
"Kadang achah-e"(Jn.19:28). Mihem chu an nelou a jong ni 40 lang kihing thei ahin, hinlah twi donlou hel'a nithum kal kihing jou behlou ahi tin athem hon asei uvin ahi. Leiset mihem te twi vang chu idon jou chomkhat teng idang chahloi jengah ahi. Hinlah Jesun asei, "Ken kapeh ding hintwi don a vang chu dangchah kitta louhel ding ahi"Jn. 4:14. Hiche hintwi chu ahileh ama lhagao (spirit) or alungsetna (grace) tina ahin, achangkha ho chu khangtou jingdiu tina ahi.
6. NATOH KHAT CHU MOLSO TEI DING AHI (Don't give up. Finish it):
"Akichai tai" (Jn. 19:30). Pathen kouna changa ama lenggam a dinga natong ho chu hahsatna ni hihen lhasetni hijongleh thoh kut kut'a tuhdet jinga molso gottei ding ngaiyah ahi. Jesu jong Gethsemane hon a ulthisan valeo in ana tauvin, ahin nungchon louvin calvary lhang chan in anatoh amolson ahi. Lasem pan "Miten amusit hiche cross luichu, ken tuhdet jing ding, nikhat leh lallukhuh toh kalhet ding" ati hi avel in geldoh kit leohen ikideisah uvin ahi.
7. HINKHO HI PATHEN A NGAPLHAH JING DING (Place your life in God's hand):
"Pa nakhut ah, kalhagao kapei" (Lk. 23:46). Benny Prasad in Bihar nupi Covid-19 survivor khat interview abolna video chu ina mu tauvin, isolation room a lungkham tah a aumpet a Pathen koma ahinkho allhan a, nikho 11 jouva ahung damdoh thu jong ihesoh kei uvin ahi. Ama lung monna Bible chang chu "Pakai neibol dam leh damtheng sel tange" (Jeremiah 17:14) ti ahi. Hijeh chun tahsan chate hon ihinkhou hi thina ding hihen hinna ding hijongleh Pathen khut a ngaplhah a lungmongsel a hinkho mangjing ding ngaiyah ahi.
Hiche article chomcha hinsim jouse Pathen in phatthei naboh cheh tauhen.
-Paominlun Khongsai,Guwahati.
8th April 2023
