GAM LEH NAM DAMNA DINGA ANGAICHA PEN CHU IPI AHI TADEM?
Tulai tah Kukite hi ichennao mun jousea jatdang ho muda leh musit nam ichan uhi igel leh lhaset leh muiset aumlheh in, hinlah hiche hi ajeh umtei ding ahi. Bangladesh leh Myanmar akon sopi ho cheng inn le lou neilou a galjam, chuleh ichen tam napen’u Manipur jenga jong thinglhang a cheng ho reserve forest sunga cheng nahi tia achenna inn kiphet peh, phaicham a cheng ho la wetland(Phailei) ahi bouve tia kino doh dinga umkit nalai ahi.
Hiche ho cheng hi ipi jeh ham tin kidong leohen ajeh chu sei jou jai hilou hel ding ahi. Abang khat in tule tua thunei vaihom Govt. ingoh maitheiyu, abang chun thingnoi-songnoi, civil society lamkai ho chuleh iki lungkhat thei lou jeh u ahi tia kingoh tohna hi simsen lou hitei ding ahi.
Nampin jum leh jachat ithoh uhi, ipi jeh hitam tia nam lamkai ho jeng jong lungdong gam’a bol masah pen ding leh bol nukhah ding jong helou khop a lungdonga thachol gamu ahitauvin ahi. Chenkhompi jatdang ho thahatna jeng seiya eiho leh eiho kisulung neo gam’a a lamkai ti, a mipi ti, kimeisan gamah ahitan ahi.
Vannoi gamdang gah veleo hen monna neilou a mi kitha tamna gam Syria, Nigeria, N.Korea tiho khu khangtou louhel, chuleh Kani (Poppy) kiha bolna gam Afghanistan gam jong vutvai khuleo a neh leh chah hah nagam ahi chu ihesoh kei uve. Kukite hin achunga kimin phah gam ho toh kikhehna beihel’a Pathen semsa monna neilou mihem thisan iso nao leh koima Govt. injong aphal lou kaani lei (business) ibol nauva kon gam leiset jong hin ei sapset gamu hitam tilou thei ahipoi.
Kum phabep masanga vannoiya Mission natoh nalam a ahat pen gam America te jeng jong, nom ahinsah uva, phatthei aboh pao Pathen ahin suhmil phat uvin hamsetna nasatah achang thou uvin ahi. Vannoiya setna jouse hung kipatna munpi khat in ahung pang tan ahi. Veleo hen tuhin phattin in school leh college, lahvel a mass shooting jeh a monna nei lou student athi hi tampi ahitan, lungmong lhamonga chate school kaisah gamlou tam ahitan ahi. Vannoiya super power ahinao jong Russia ahilou leh China in ahin lahpeh nadiu nailam ahitan ahi.
Hiche laitah chun tulai tah a vannoi miten kidang asah leo din U.S. gam a Kentucky state sunga Asbury University sunga student ho lah a spiritual revival nasatah a ana lhungin ahi. Student hon class jong lathei talou a Feb 8, 2023 apat asun ajan a tanglou’a hapta 2 sung revival nasatah ana lhunga, munchom chom akon mi asang sang ana kitol jinga, mipi chu lhagao a gilkel leh dangchah ahiuvin ahi. Hiche khu ivet leh khangthah ho cheng khun agamsunga huinun dan lungdong mangbatna anei uva, akhon nakheh a Pathen bel nomna ahin nei uva kon hung pengdoh hitei din tahsan aumin ahi. Hetding khat chu tuchan a vannoiyin America te agin nao hi apu apa teo Pathen ginjeh a, vangboh changu ahi kiti leh kisei khel lou ding ahi.
Tun Kukite hi hichan geiya jatdang te chotpha ihi jou nung uva jong, nahtah a Pathen koma kisih a thupha choiding golou a, khat leh khat kikoto ibol pau hi haisan phat hita lou ham?. Hibanga nampin hamsetna ito chengu hi phatah a igel leh achangdia lom ihi nau jong tama ahi. Pathen in eingailut jeh uva ijepnao jong hithei ahin, hijeh chun amalam jon kit dinga eikou nao a ilah thei leo hiche chu tule tua solution umpen hiding ahitan ahi.
Nam thodoh kit nadinga apoimo pen chu nam lamkai, nam sepai, politicians, haosa upa chuleh officers ineo hou a kison ding hilou in, ahon a lhagao lam halthahna (mass spiritual revival) hi ngaicha ahitan ahi. Pathen thua dangchahana inei uva, chonset kisih puma Pathen ibel leo aman donlou in eikoi sam povinte. Bible thutheng a “Kanam miten, thilse bol ahaiyuva, lungheiya kahenga ahung tao leu, keiman ka ngaidam a, agamsungu kasemphat kit ding ahi” (2 Chrinicle 7:14) akitin ahi.
Covid-19 hung kichai jou 2022 kum sung se chu muntin a golnop/golseh hi tanglou hel in ina bol uvin, imakho uva thimpi jin ding hi muthei lou ibang gam tauvin ahi. Social program titah lou a, houbung khoppi ho jeng jong hi atamjo kumlhun kivaihomna leh golnop/kimuto nalang ngen in achetan, lhagao lam a halthahna hi agamla tul tul jeng tan ahi. Pathen lhagao ki puihoi sah lou a, eiho joh in ama hi eima deilam lam a kaihoi ding kigo abang jeng tan ahi.
Tua hi gamleh nam damna dinga ingaichat pen uchu koi denomination ti umlou a, khangthah ho lah a koima sol hat thu hilou a eima chamtah a lhagao lam’a gilkelna leh dangchahna neiya, kisih pum’a Pathen ibel phat u ahitan ahi. Migam a Revival nasatah a alhun thei leh, eiho gam a jong lhung mo ahipon ahi. Ama alung alhai pou leh gam neocha S.Korea te phatthei aboh banga, eiho nam lhomcha jong phatthei eiboh theiyu ahi. India khopi munchom chom a kol leh vai lah a innmun leh loumun neiman a kihetmo sah thei ihi pouvin ahi. Tuni hihih jong leh nikhat tei chu ihung kondohna thinglhang gam lhangaina kinei tei ding ahi. Hijeh chun gam leh nam ana mahthah masangin, thupha choi puma Pathen kom bel chu lampi umsun ahi.
Hiche revival huinun hin nasatah a igam sungu ahin mut lou leh khang ijat hamkhat amang thah ding, mite chotpha, chuleh khamna thei a kivei leh ajoh nam mite tia min eihet jing diu ahitan ahi. Pu leh Pa te hansan na kisonpia kilubuh letsah gunset hina pa hi pailhah a ihou Pathen hatna joh a kalson hi galjona hiding ahi. Mass spiritual revival/reformation ahung umteng, socio-political leh economic reformation injong ahin jop teiding hi gingcha lel pou hite.
-Paominlun Khongsai, Guwahati
