Ahung kiphudoh Dan le Athusim Chomcha :
Eisempao Pathen taaahsana- eihuhhingpao Pakai Jesu Christa thisan a lhatdoh sate, adeha Kukite lhagao le tahsa lam a lungkhat le thakhat tah a machal theina dinga, koima Houbung tuma hilou chule kaina-bena tum neilou lhagao lam kiloikhomna Kuki Worship Service, Guwahati [KWS(G)] hi Kuki Students Organisation, Guwahati, [KSO (G)] le alamkai hou, adeh a President anahi, Alet Doungel hapanna jala, simlai hole hiche petna, natoh na jatchom chom nei pate nute hole adang dang, chule angailuho jouse pohnatna jalle, Pathen panpina jala, 17th Nov. 1997 nia Upa V.Changsan ina kihoulhahna dung juia ana kiphut doh ahi toh lhon in, nisim 4th January 1998 nikho in, Satribari Christian Hospital Chapel,Guwahati, muna Pathen heng'a thensonna le lhandoh anahi tai.
4th Jan.98 nia kaikhom masah pen ni chun akaikhom mi 73 bou anahin chule manchah ding thil tampi ana kingaichat jeh in nule paten apan nathei cheh uvah ana pangun ngaichat jouse ahin tohkhomun, thanomtah in ahung kimachallin, Pathen phatthei boh najallin, tuhin membership 400 akilhingtai.
Phat chom khat pi KSO(G) ten analamkai jouvin, nisim 9th October 1998 nia KWS(G) Executive Committee Kilolna dung juiin, KSO(G) ten KWS(G) analamkai nau le mopohna jouse Houbung mipiho khuta ana pehdoh utoh kilhon in, Oct.15, 98 nin houbung mipi lamkai kilhenna ana kineijin hitichun, KWS(G) hi Pathen le Houbung mipite phatsahna jalin, pilhingsela kivaihom le kivaipohin ana umtai. KWS(G) chena lhongpi le kivai pohna Danpi (Constitution) neilou akhohdan gelkhohna ahitoh kilhonin, mijouse hetthei le kilungtoh tah a juicheh ding in hiche KIVAIPOHNA DANPI hi nisim 7th April, 2002 nin Houbung mipin pom nale suhdetna ana kineitai. KWS(G) sunga ahin koi houbung hihen, mimal hijong leh tahsan kibahpi le Kipana Thupha seiphong naa pan la le natong khom nom jouse kiloikhomna ahung hijing-e.
